फोर नेसन्स कप बक्सिङमा नेपाललाई ४ स्वर्ण

१ वैशाख, काठमाडौं । भुटानको थिम्पुमा सम्मन्न फोर नेसन्स कप बक्सिङ च्याम्पियनसिप २०२५ मा नेपालले चार स्वर्ण, तीन रजत र दुई कास्य पदक जितेको छ । यो नतिजासंगै ४ राष्ट्र सहभागी भएको प्रतियोगितामा नेपाल दोस्रो भयो । भुटान पहिलो भयो ।

यिनै चार टिमको संयुक्त प्रशिक्षण शिवीर पनि सम्पन्न भएको नेपाल बक्सिङ महासंघका उपाध्यक्ष श्यामकाजी अवालेले जनाएका छन् । प्रशिक्षण अप्रिल ८–१० तारिख तथा प्रतियोगिता अप्रिल ११–१३ तारिखसम्म भएको थियो । नेपालको ७ खेलाडी फाइनल पुगेकोमा चारले स्वर्ण जित्न सफल भए ।

महिला ५० केजी तौलसमूहमा नेपालकी आरती बम्जनले भुटानकी जामो जिग्दाललाई ५–० अंकमा पराजित गरी पहिलो स्वर्ण दिलाइन् । महिला ५२ केजीमा नेपालकी अस्मिता दुवालले भुटानकै डेमो नोर्नुलाई ५–० अंकले आधारमा हराउदै नेपाललाई दोस्रो स्वर्ण दिलाईन् ।

त्यसैगरी महिला ५४ केजीमा नेपालकी वर्षा श्रेष्ठले भुटानकै लामो तासीलाई ४–१ अंकको पछि पार्दै स्वर्ण जितिन् । पुरुष ५१ केजीमा नेपालका लक्ष्मण राईले भारत (सिक्कीम) का कृष्ण कैलाश राईलाई ५–० अंकको आधारमा पाखा लगाउँदै स्वर्ण जिते ।

पुरुष ४८ केजीमा नेपालका लालप्रसाद उप्रेती भुटानका प्रतिस्पर्धात्मक खेलमा दोर्जे मगरसंग ४–१ अंकले पराजित हुँदै दोस्रो भए । पुरुष ५४ केजीमा नेपालले ठूलो आशा गरिएका चन्द्रबहादुर थापा बंगलादेशका महोमद उन्सोव संग फाइनलमा ३–२ अंकले चुके ।

तीनै राउन्ड नै आफ्नो पक्षमा पार्दै उत्कृष्ट खेल प्रदर्शन गरेका चन्द्रले अन्तिम राउन्डमा रेफ्रिको चेतावनी पाई अंक बराबर हुदा पुनः जजहरूले अंक दिदा ३ः२ ले पछि पर्दै रजतमा सीमित भए । यसअघि चन्द्रले सेमिफाइनलमा भारतका खेलाडीलाई ५–० ले पन्छ्याउदै फाइनल पुगेका थिए ।

भुटान बक्सिङ संघद्वारा आयोजित प्रतियोगितामा नेपालबाट प्रशिक्षकमा मुख्य प्रशिक्षक ओलम्पियन प्रविन तुलाधर, आईबा थ्री स्टार कोच दिपक महर्जनका साथमा सहयोगी प्रशिक्षकहरु उमेश कटुवाल र सन्दिप श्रेष्ठ थिए ।

भुटान बक्सिङं संघको निमन्त्रणामा प्रतियोगिता स१चालनका लागि टेक्निकल डेलिगेट हेडको रुपमा नेपालको पहिलो अन्तराष्ट्रिय टेक्निकल अफिसियल पुष्करराज पन्तलाई जिम्मेवारी दिइएको थियो ।

रेफ्रि-जजमा नेपालबाट आईबिए थ्री स्टार रेफ्री-जज धनकुमार मैनाली, टु स्टर रेफ्री-जज सन्तोष आले मगर, वान स्टार रेफ्री-जज अनुराधा लामा, जिवन कवां र राजकुमार महर्जनले निर्णायकको भूमिका निर्वाह गरेका थिए । नेपालबाट सहभागी असिम न्यौपानेले स्कोरिङ अप्रेटरको भूमिका निर्वाह गरेको थिए ।