२०८२ वैशाख ३ गते १७:३४ 
३ वैशाख, काठमाडौं । अफगानिस्तानले आईसीसी यू-१९ विश्वकप एसिया छनोटमा लगातार तेस्रो जित निकालेपछि शनिबार हुने नेपाल र अफगानिस्तानबीचको खेल निर्णायक बनेको छ ।
बुधबार माथिल्लो मुलपानी क्रिकेट मैदानमा भएको खेलमा अफगानिस्तानले यूएईलाई डिएल पद्दतिमा १८० रनले हराएको हो । योसँगै यूएई, हङकङ र ओमान छनोटको होडबाट बाहिरिएका छन् ।
अफगानिस्तानले दिएको ३६० रनको विशाल लक्ष्य पछ्याएको यूएई २८ ओभरमा ९५(४ को अवस्थामा हुँदा पानी परेर केहीबेर खेल रोकिएको थियो । त्यसपछि ४७ ओभरमा झारिएको खेलमा यूएईले ३४९ रनको लक्ष्य पाएको थियो ।
उक्त लक्ष्य पछ्याएको यूएई ४७ ओभर खेल्दा ७ विकेट गुमाएर १६८ रन बनाउन सक्यो ।
खेलमा टस जितेर पहिले ब्याटिङ गरेको अफगानिस्तानले खालिद अहमदजाईको शतक तथा उजेरुल्ला नियाजाई, बर्कत इब्राहिमजाई र कप्तान महबुब खानको अर्धशतक मद्दतमा ४ विकेट गुमाएर ३५९ रनको विशाल योगफल खडा गरेको थियो ।
प्रतियोगितामा नेपाल र अफगानिस्तान दुवैले ओमान, हङकङ र यूएईलाई हराउँदै तीन जित निकाले । अफगानिस्तानले तीनवटै खेलमा फराकिलो जित निकालेका कारण नेट रनरेटमा नेपालभन्दा अघि छ । नेपालले यूएईलाई ५ रनको अन्तरले मात्र हराएको थियो ।
अब शनिबार नेपाल र अफगानिस्तानबीचको विजेता टोली २०२६ मा हुने आईसीसी यू(१९ विश्वकपमा छनोट हुनेछ । काठमाडौंमा अब केही दिन वर्षाको पनि सम्भावना रहेकाले यदि खेल नभएमा भने अफगानिस्तान छनोट हुनेछ ।
प्रतिक्रिया 4