अन्तर्राष्ट्रिय जुडोको पहिलो दिन पामलाई ७ स्वर्ण, लक्की र सुष्मा डेफ ओलम्पिकमा छनोट

४ बैशाख, काठमाडौं । बन्दी सहायता नियोग (पाम) ले नेकोस सातौं अन्तर्राष्ट्रिय जुडो प्रतियोगिताको पहिलो दिन बिहीबार ७ स्वर्ण जितेको छ ।

पहिलो दिन ११ स्वर्णको टुंगो लाग्दा पामले पुरुषमा ४ र महिलामा ३ स्वर्ण गरी कूल ७ स्वर्ण जितेको हो । एपीएफले २ तथा बाँके र रुसले समान १–१ स्वर्ण हात पारे ।

नेपाल खेलकुद महासंघ (नेकोस) तथा राष्ट्रिय जुडो संघ नेपालको संयुक्त आयोजनामा भएको प्रतियोगितामा पुरुष २० केजीमुनि विष्णु गिरी, २५ केजीमुनि अस्विन तामाङ, ३५ केजीमुनि बविन कुमाल दियाली र ५५ केजीमुनि दीपेश गुरुङले पामलाई स्वर्ण दिलाए ।

फाइनलमा विष्णुले बहुउद्देश्यीय मार्सल आर्ट केन्द्र (एमएमएसी) का प्रिन्स विक, अस्विनले एमएमएसीका दियान तामाङ, बविनले बाल विकास स्कुलका आदित्य श्रेष्ठ र दीपेशले कोशी प्रदेशका लक्ष्मी राजवंशीलाई पराजित गरे ।

पुरुषकै ४५ केजीमुनि रुसका डेविड मगोमेदोबले भुटानका निमा तेन्जिन तथा ६६ केजीमुनि एपीएफका विशेष विकले दाङका सुन्दर राना मगरलाई फाइनलमा हराउदै शीर्ष स्थान हात पारे ।

पामका लागि महिला २८ केजीमुनि कृष्णा महतरा, ४४ केजीमुनि समिता नेपाली र ५२ केजीमुनि विनिता नेपालीले स्वर्ण जिते । कृष्णाले फ्रान्सकी लि प्लान्टार्ड, समिताले एसओएस जुडो डोजोकी मनमाया तामाङ र विनिताले भुटानकी तान्डिन दोर्जी वाङमोलाई हराए ।

नयाँबजरस्थित खुशिबुँमा भएको प्रतियोगिताको महिला ३६ केजीमुनि बाँकेकी खिमा रोका पहिलो भइन् । खिमाले फाइनलमा एमएमएसीकी रेनिशा वाइबालाई पराजित गरिन् । महिला ६३ केजीमुनि फाइनलमा एपीएफकी रेखा श्रेष्ठले पामकी लक्ष्मी श्रृषलाई पराजित गर्दै पहिलो भइन् ।

प्रतियोगिताको नेकोसका इन्चार्ज जेएन थपलियाले एक कार्यक्रमबीच उद्घाटन गरे । प्रतियोगितामा नेपालका विभिन्न जिल्ला/क्लब, रुस, भुटान, फ्रान्स, काजाकिस्तान र भारतका २ सय ८ खेलाडीको सहभागिता रहेको राष्ट्रिय जुडो संघ नेपालका अध्यक्ष धर्मकुमार श्रेष्ठले जनाएका छन् ।

पुरुषमा १२ र महिलामा ११ गरी २३ स्पर्धामा २१ वर्षमुनिका खेलाडी सहभागी छन् । प्रतियोगिताको अन्तिम दिन शुक्रबार १२ स्पर्धाको फाइनल हुनेछ ।

लक्की र सुष्मा डेफ ओलम्पिकमा छनोट

लक्की चौधरी र सुष्मा तामाङले प्रथम पारा जुडो प्रतियोगितामा स्वर्ण जितेका छन् । पुरुष ६० केजीमुनि फाइनलमा लक्कीले प्रशान्त चौधरीलाई पराजित गरे । क्षितिज ठगुन्ना तेश्रो भए ।

महिला ५२ केजीमुनि फाइनलमा सुष्माले विपना पुनलाई पराजित गरिन् । भवानी श्रेष्ठ तेश्रो भइन् । प्रतियोगिता नेकोस र राष्ट्रिय जुडो संघसहित नेपाल बहिरा तथा दृष्टिविहीन पारा जुडो संघको संयुक्त आयोजनामा भएको हो ।

आ–आफ्नो स्पर्धामा पहिलो भएका लक्की र सुष्मा जापानमा नोभेम्बरमा हुने डेफ ओलम्पिकका लागि छनोट भएको नेपाल बहिरा तथा दृष्टिविहीन पारा जुडो संघका वरिष्ठ उपाध्यक्ष धर्मकुमार श्रेष्ठले जनाएका छन् ।