२०८२ वैशाख १२ गते १९:१२ 
१२ वैशाख, काठमाडौं । आगामी मे मा थाइल्यान्डमा आयोजना हुने आईसीसी महिला टी-२० विश्वकप एसिया क्वालिफायरको लागि नेपाली टोली घोषणा भएको छ ।
नेपाल क्रिकेट संघ (क्यान)ले शुक्रबार इन्दु वर्माको कप्तानीमा १४ सदस्यीय अन्तिम टोली घोषणा गरेको छ । युवा अलराउण्डर पुजा महतोलाई पहिलो पटक उपकप्तानको जिम्मेवारी दिइएको छ ।
दोस्रो चरणको प्रशिक्षणमा रहेका २० खेलाडीबाट अन्तिम टोली घोषणा गरिएको हो ।
टोलीको अन्य सदस्यहरुमा बिन्दु रावल, सम्झना खड्का, रुबिना क्षेत्री, रोमा थापा, कविता जोशी, रुबी पोदार, राजमती ऐरी कविता कुँवर, सबनम राई, इश्वरी विष्ट, मनिषा उपाध्यया र रिया शर्मा छन् ।
दोस्रो चरणको प्रशिक्षणमा रहेका काजल श्रेष्ठ, सोमु विष्ट, यशोदा विष्ट, सीता राना मगर, सिमाना केसी र रचना चौधरी भने अन्तिम टिममा पर्न सकेनन् ।
पछिल्लो पटक नेपालले युगाण्डा भ्रमण गर्दाको टिमबाट अहिले टिममा पाँच परिवर्तन भएको छ । चोटका कारण युगान्डा टुर गुमाएकी कविता कुँवरसहित ४ खेलाडीले टोलीमा पुनरागमन गरेका छन् । यस्तै रुबी पोद्दार, मनिषा उपाध्याय र सबनम राई टोलीमा पुनरागमन गरेका हुन् । युगाण्डा टुरमा गएका सना प्रवीन, ममता चौधरी, एलिशा यादव र रचना चौधरी बाहिरिएका छन् ।
मे ७ देखि २१ सम्म हुने एसिया क्वालिफायरमा नेपालसहित ९ टिमले प्रतिस्पर्धा गर्नेछन् । यसबाट शीर्ष दुई टोली ग्लोबल क्वालिफायरमा छनोट हुनेछ । ग्लोबल क्वालिफायरमा १० टोलीले प्रतिस्पर्धा गर्नेछन् र शीर्ष चार टोली अर्को वर्ष जुन-जुलाईमा इंग्लयाण्डमा हुने महिला टी२० विश्वकपमा छनोट हुनेछ ।
प्रतिक्रिया 4