५१ दिनसम्म ‘होस्टेल ३’ले कति कमायो ?

काठमाडौं । ‘होस्टेल ३’ले सोमबार प्रदर्शनको ५१ दिन पुरा गरेको छ । देशका केही प्रमुख मल्टिप्लेक्समा फिल्मले यो उपलब्धि हासिल गरेको हो । न्यूरोडको रञ्जना हलमा आयोजित समारोहमा फिल्मका कलाकार र निर्माताले खुसी साटे ।

प्रदर्शनको ५१ दिनसम्म सशान कँडेल ‘सन्तोष’ निर्देशित फिल्मले सरकारको आधिकारिक बक्सअफिसमा ४ करोड १० लाख रुपैयाँ ग्रस कमाइ गरेको छ । २०८१ सालमा सर्वाधिक कमाउने फिल्मको सूचीको १३ औं स्थानमा यो फिल्म छ ।

नयाँ निर्देशक र कलाकारलाई लिएर बनाइएको यो फिल्मले केही सातासम्म उत्कृष्ट कमाइ गरेको थियो । टिकटक र टेलिभिजन रियालिटी शोको पृष्ठभूमिबाट उदाएका नयाँपुस्ताका कलाकारलाई लिएर बनाइएको यो फिल्ममार्फत कुल ब्वाय ‘पारस बम’, रिहान गिरी, सिम्रन पन्त, आशिष घिमिरे चर्चामा आए ।

यो फिल्मको तेस्रो श्रृंखला बनाउने चर्चा पनि छ । यद्यपि, यसबारे निर्माताले आधिकारिक पुष्टि गरेका छैनन् ।