चितवन राइनोज

नेपाल प्रिमियर लिग (एनपीएल) मा प्रतिस्पर्धा गर्ने बागमती प्रदेशभित्रको काठमाडौंपछि अर्को टोली हो चितवन राइनोज ।

राजधानी काठमाडौं र उपत्यकाको प्रतिनिधित्व काठमाडु गुर्खाजले गर्नेछ भने चितवनले राइनोजले यस प्रदेशको तराई क्षेत्रको प्रतिनित्व गर्नेछ । चितवन राइनोज चितवन मेडिकल कलेजको स्वामित्वमा रहेको छ ।

चितवन राइनोजको मार्की खेलाडीमा युवा अलराउण्डर कुशल मल्ल छन् । उनी एनपीएलमा मार्की बन्ने सबैभन्दा कान्छो खेलाडी हुन् । २० वर्षीय कुशल आक्रमक ब्याटिङ र स्पीन बलिङ गर्छन् ।

अर्कोतर्फ चितवनमा हाल खेलिरहेका मध्ये नेपालका सबैभन्दा भेट्रान खेलाडी शरद भेषावकर पनि छन् । नेपालका लागि सन् २०१४ को विश्वकप खेलिसकेका भेषावकर अक्सनमा सुरुमा कसैले नजर नलागएपनि पछि चितवन राइनोजले विसलिस्टबाट अनुबन्ध गरेको थियो ।

कुनै समयमा शरदको कप्तानीमा कुशल मल्लले खेलेका थिए । कुशललाई फ्रेन्चाइजमा शरदले नै ग्रुम गरेका थिए । अहिले कुशल मार्की रहेको टिमले शरदलाई अनुबन्ध गरेको छ । एनपीएलमै नेपाली खेलाडीमध्ये शरद सबैभन्दा अनुभवी र पाका खेलाडी हुन् । सुरुमा कसलै नलिएपनि उनलाई पछि चितवनले लिएको थियो । अनुभव टिमलाई काम लाग्न सक्छ । शरदसँगै राष्ट्रिय टिममा खेलेका ज्ञानेन्द्र मल्ल एनपीएलमा कर्णाली याक्सका प्रशिक्षक छन् ।

कुशल र शरदसँगै चितवनमा दुई पेस बलर रिजन ढकाल र कमलसिंह ऐरी छन् । रिजन हाल राष्ट्रिय टिममा छन् भने कमलले राष्ट्रिय टिमबाट खेलिसके ।

यस्तै उमेर समूहका दीपक बोहरा, विपिन रावल, रन्जित कुमार जस्ता युवा खेलाडी पनि चितवनमा छन् । राष्ट्रिय टिमबाट नखेलेकामध्ये घरेलु क्रिकेटमा राम्रो अलराउण्डरको रुपमा रहेका अमरसिंह राउटेला पनि चितवनमा छन् ।

कागजमा हेर्दा भने चितवनको टिम कमजोर देखिएको छ ।

चितवन राइनोजको टिम:
ओनर : चितवन मेडिकल कलेज (आयुष न्यौपाने, डा. हरिश न्यौपाने)
मार्की खेलाडी : कुशल मल्ल
अन्य खेलाडी : रिजन ढकाल, कमल सिंह ऐरी, शरद भेषावकर, दिपेश श्रेष्ठ, अमरसिंह राउटेला, दीपक बोहरा, सन्तोष कार्की, गौतम केसी, रन्जित कुमार, विपिन रावल
विदेशी खेलाडी : सोहेल तनविर, लुक बेनकेन्स्टेइन, हसन एइसाखिल, निकोल जान लोफ्टी-इटन, रबि बोपारा
मुख्य प्रशिक्षक : उमेश पटवाल

बलियो पक्ष : मिडल अर्डर ब्याटिङ र पेस बलिङ

चितवनको सबैभन्दा बलियो पक्षको रुपमा मिडल अर्डर र पेस बलिङ रहेको छ ।

मार्की खेलाडी कुशल मल्लसहित अनुभवी शरद भेषावकर, भेट्रान रवि बोपारा र अलराउण्डर जान निकोल लोफ्टी इटन मिडल अर्डरमा छन् । उनीहरुसँग टी२० को राम्रो अनुभव पनि छ । लफ्टी इटनले टीयू मैदानमै टी२०आईमा सबैभन्दा छिटो शतक प्रहार गर्ने कुशल मल्लको कीर्तिमान तोडेका थिए । टप अर्डर कमजोर हुँदा चितवनको इनिङ्स मिडल अर्डरले नै धान्नुपर्नेछ ।

यस्तै पेस अट्याक पनि राम्रो छ । नेपाली राष्ट्रिय टिमबाट खेलिसकेका दुई पेसर रिजन ढकाल र कमल सिंह ऐरी सहित विदेशी खेलाडी मर्चेन्ट डे ल्याङ पेस बलिङमा हुनेछन् । उनीहरुलाई घरेलु दीपेश श्रेष्ठ र अलराउण्डर अमर सिंह राउटेलाको साथ हुनेछ ।

लेफ्ट ह्याण्ड पेसर रिजनले केही समयअघि राष्ट्रिय टिमसँग लिग टु का लागि क्यानडा र अमेरिका टुर गरेका थिए । पछिल्लो समय उनी राम्रो सम्भावना देखाएका छन् । २०२० मै राष्ट्रिय टोलीमा डेब्यु गरेका कमल भने चोटका कारण केही समय बाहिर रहे । उनी पुनरागमनको पर्खाईमा छन् । दक्षिण अफ्रिकी भेट्रान मर्चेन्ट डे ल्याङसहित रिजन र कमलको पेस अट्याक राम्रो देखिन्छ ।

दक्षिण अफ्रिकाको राष्ट्रिय टिमबाट तीनवटै फर्म्याट खेलिसकका डे ल्याङसँग विश्वका विभिन्न देशका लिग खेलेको अनुभव छ र त्यो अनुभव एनपीएलमा काम लाग्न सक्नेछ ।
डे ल्याङले आईपीएलसहित पीएसएल, सीपीएल, लंका प्रिमियर लिग, भाइटालिटी ब्लास टी२०, दी हन्ड्रेड क्रिकेट, दक्षिण अफ्रिकी टी२० लिग लगायत खेलेको अनुभव छ ।

कमजोर पक्ष : टप अर्डर र स्पीन बलिङ

चितवनको टप अर्डर र स्पीन आक्रमण भने कमजोर देखिएको छ । अक्सनमा चितवनले पेस बलरबाहेक अन्य स्टार खेलाडी अनुबन्ध गर्न सकेन ।

ओपनिङमा खेल्ने सन्तोष कार्की र विपिन रावलसँग ठूलो खेलको अनुभव छैन । यसैले टप अर्डरमा चितवन विदेशी खेलाडीमा निर्भर छ । चितवनले इंग्ल्याण्डका भेट्रान रवि ओपारा, इंग्ल्याण्डका यू१९ टिमका लुक बेनकेन्स्टेइन र अफगानिस्तानका यू१९ टिमका हसन एइसाखिललाई अनुबन्ध गरेको छ ।

लुक र हसनले ओपनिङ गर्न सक्छन् तर ठूलो लिग खेलेका छैनन् । रवि बोपारा विशेषगरी मिडल अर्डरमा खेल्ने गर्छन् । मार्की खेलाडी कुशल मल्लले पनि ओपनिङ गर्न सक्छन तर उनी पछिल्लो समय मिडल अर्डरमा खेल्दै आएका छन् ।

टप अर्डरमा युवा खेलाडी वा विदेशी खेलाडीले खेलेमा राम्रो सुरुवात दिलाउनुपर्ने चुनौती हुनेछ । मिडल अर्डरमा भने कुशलसहित नामिबियाका जान निकोल लोफ्टी इटन, शरद भेषावकर र अमरसिंह राउटेला जस्ता खेलाडी छन् ।

यस्तै स्पीनमा पनि चितवनमा नाम चलेका खेलाडी छैनन् । स्पीनमा युवा स्पीनर रन्जित कुमार छन् भने कुशल मल्ल स्पीन अलराउण्डरको रुपमा खेल्नेछन् । यस्तै ब्याटिङ अलराउण्डर लोफ्टी इटनले लेग ब्रेक बलिङ गर्नेछन् । शरद भेषावकरले पनि पार्ट टाइम स्पीन गर्नेछन् ।