

Mani Kumar Lama
Nepal, Midfielder

बहुप्रतिभाको धनी मणि लामा
फुटबल खेलाडी मणि कुमार लामा बहुमुती प्रतिभाको धनी हुन् । उनी खेलाडी एक खेल अनेक भनेजस्तै धेरै खेल खेल्ने खेलाडी हुन् ।
हाल नेपाली राष्ट्रिय फुटबल टिमका सदस्य रहेका २८ वर्षीय मणि कुनै बेला टेबल टेनिस खेल्थे । पछि उनले रमाइलोका लागि फुटसल खेल्दै राष्ट्रिय फुटसल टोलीबाट पनि खेले ।
नेपाली राष्ट्रिय पुटबल टोलीका मिडफिल्डर उनले सिनियर टमबाट एक खेल मात्र खेलेका छन् । तर उनी नेपालका लागि खेल्दै योगदान दिन चाहन्छन् ।
मणिले २०७९ साल चैतमा नेपालमै भएको प्रधानमन्त्री थ्री नेशन्स कप फुटबलमा लाओस विरुद्ध खेल्दै नेपालका लागि डेब्यु गरेका थिए । उनले ८ चैतमा दशरथ रंगशालमा भएको खेलमा ७४औं मिनेटमा नविन लामालाई रिप्लेस गर्दै डेब्यु गरेका थिए । त्यसपछि उनले १२ चैतमा लाओस विरुद्ध नै भएको फाइनलमा भने पूरा समय मैदानमा बिताएका थिए ।
उक्त खेल जित्दै नेपालले प्रतियोगिताकै उपाधि जितेको थियो । मणिले फुटबलको पहिलो प्रतियोगिता खेल्दा नै उपाधि उचाल्ने अवसर पाए ।
नेपालको पहिलो फुटसल राष्ट्रिय टोलीका सदस्य समेत रहेका उनले सन् २०१७ देखि नेपालबाट फुटसल खेलेका थिए ।
कुनै बेला टेबल टेनिस खेल्ने उनी फुटसल हुँदै फुटबलको राष्ट्रिय टिममा पुगेका हुन् । त्यसैले उनले २७ वर्ष भएपछि मात्र फुटबल टिमबाट डेब्यु गर्ने अवसर पाए ।
ढिलै भएपनि चर्चित खेलबाट नेपालको प्रतिनिधित्व गर्न पाउँदा उनी निकै हर्षित थिए ।
फुटसलबाट फुटबलमा
फुटबलमा आउनुअघि मणि फुटसल खेल्थे । उनले नेपालको राष्ट्रिय फुटसल टोलीबाट तीन पटक अन्तर्राष्ट्रिय प्रतियोगिता खेलिसकेका छन् ।
सन् २०१७ देखि २०२२ सम्म उनले फुटसलको अन्तर्राष्ट्रिय प्रतियोगिता खेलेका थिए ।
उनी फुटसलबाट फुटबलमा जानुको पनि रमाइलो संयोग छ । फुटबल उनको सानैदेखि मन पर्ने खेल थियो । तर उनी ढिलो मात्र यस खेलमा लागे ।
२०७५ सालमा उनी टेबलटेनिस खेलाडीका रूपमा खेलाडी कोटामा विभागीय टोली एपीएफमा आबद्ध भएका थिए । तर २०७६ मा एसियन फुटसल च्याम्पियनसिप छनोटका लागि राष्ट्रिय टिममा परेपछि उनको यात्रा मोडियो । अनी उनले औपचारिक रुपमा फुटसलको प्रशिक्षण लिए ।
मणिले २०७६ मै एपीएफबाट ए डिभिजन लिगमा पहिलोपटक खेले । धेरै अवसर पाएनन् । तर २०७८ को लिगमा भने धेरै खेले । सोही वर्ष मणिसहितको एपीएफले आहा रारा गोल्डकप र विराट गोल्डकप गरी मोफसलका दुई प्रतियोगिता जित्यो ।
त्यही लिगमा गरेको प्रदर्शनका आधारमा उनी राष्ट्रिय टिमका मुख्य प्रशिक्षक भिनसेन्जो अल्बर्टव एनेसको नजरमा परे । लगत्तै उनले डेब्यु पनि गरे । मणिका लागि यो बफैँमा सरप्राइज्ड जस्तै थियो ।
टेबलटेनिस र फुटसल खेलेपनि फुटबल खेल्दा भने उनलाई छुट्टै मज्जा भयो ।
सन् २०१७ मा नेपाल फुटसल टिमले पहिलो पटक इरानमा एएफसी फुटसल च्याम्पियनसिप छनोट खेलेको थियो । त्यसमा मणि प्रमुख खेलाडीका रूपमा थिए ।त्यसपछि उनले सन् २०१९ मा इरान र सन् २०२२ मा थाइल्याण्डमा एएफसी फुटबल च्याम्पियनसिप छनोट खेले । उनले तीन अन्तर्राष्ट्रिय प्रतियोगितामा ९ खेलमा सर्वाधिक ३ गोल गरेका थिए ।
सुरुवात टेबलटेनिसबाट
काठमाडौं छैमलेका मणिले आदर्श विद्या मन्दिर (एभीएम)मा मा अध्ययन गर्दा त्यहाँ टेबलटेनिस र क्रिकेटको माहोल थियो । मणिले त्यतिबेला राष्ट्रिय टिममा रहेका पुरुषोत्तम बज्राचार्यसँग टेबलटेनिस सिक्न थाले । त्यही खेलमा उनको रुची रह्यो । उनी २०६६ सालमा १४ वर्षको उमेरमै टेबलटेनिसको जुनियर टिममा परे ।
२०६९ (सन् २०१२) मा टेबलटेनिसको यू–१८ साफ च्याम्पियनसिपमा मणिले नेपाल टिमको प्रतिनिधित्व गरी टिम र डबल स्पर्धा गरी दुई रजत पदक जिते ।
अर्को वर्ष उनले वर्ल्ड जुनियर क्याडेट सिरिज र युथ एशियन गेम्स खेले । २०७३ सालमा पूर्वाञ्चलमा भएको सातौं राष्ट्रिय खेलकुदमा त्रिभुवन आर्मी क्लबबाट सिनियरतर्फ पुरुष एकलमा कांस्य जितेपछि राष्ट्रिय टिममा पनि पुगे
काठमाडौंमा फुटसलको माहोल भित्रिन थालेपनि उनले टेबलटेनिस र फुटसल दुवै खेल्न थाले ।
उनले सुरुमा धोबिघाटको काठमाडौं फुटसलबाट खेल्न थालेका थिए । पछि उनले किक अफ टिमबाट पहिलोपल्ट राष्ट्रिय फुटसल टिमको निर्माणका लागि भएको छनोट प्रतियोगिता खेले ।
त्यही गरेको प्रदर्शनपछि उनी फुटसल टिमको बन्द प्रशिक्षण हुँदै राष्ट्रिय टिमसम्म पुगे ।
प्रस्तुती : गोविन्दराज नेपाल
Read Fullसमाचार


प्लेयर्स टु वाच



