+
Home Sports Football Samir Tamang

Samir Tamang
Nepal, Forward

Full Name: Samir Tamang
Nationality: Nepal
Position: Forward

समिर तामाङ युवा फरवार्ड हुन् । उनलाई फुटबल खेल्नकै लागि जन्मिएका हुन भन्दा फरक पर्दैन । जुन हिसावमा अहिले उनी लगातार खेलिरहेका छन् र अवसर पाएका छन् त्यसले पनि यो कुरा पुष्टि गर्छ ।

१९ वर्षमै राष्ट्रिय टिमबाट डेब्यु गरेका समिरले अहिलेसम्म नेपालको घरेलु लिग संरचनामा खेल्न पाएका छैनन् । तर उनले नेपालको जुनियर देखि सिनियर टिमबाट समेत खेलिसकेका छन् ।

मोफसलका गोल्डकप प्रतियोगिताहरु लगभग सबै खेलिसकेका छन् । समिरले छोटो समयमै फुटबलमा भने छलाङ मारिरसकेका छन् । स्पीड उनको सबैभन्दा राम्रो पक्ष हो । समिरलाई रोक्न विपक्षी डिफेण्डरहरुलाई कठिन पर्छ ।

त्यतिमात्र होइन नेपालको एक मात्र फ्रेन्चाइज लिग फुटबल नेपाल सुपर लिगमा पनि समिर अब तेस्रो संस्करणमा डेब्यु गर्दैछन् । एनएसएल यही चैत १६ गतेदेखि काठमाडौंमा सुरु हुँदैछ । त्यसमा पनि उनी सामान्य खेलाडी छैनन् पोखरा थण्डर्सको मार्की प्लेअरको भूमिकामा छन् ।

पोखराले दोस्रो संस्करणमा पनि युवा खेलाडी आयुष घलानलाई मार्की प्लेअर बनाएको थियो । यस पटक पनि पोखराले अर्को नयाँ युवा खेलाडी समिरलाई मार्की बनाउँदै आयुषलाई कप्तान नियुक्त गरेको छ ।

रमाइलो कुरा के छ भने समिरले अहिलेसम्म नेपालको शीर्ष श्रेणीको ए डिभिजन लिग पनि खेलेका छैनन्, एनएसएल पनि खेलेका छैनन् । तर उनले पहिलो पटक एनएसएलमै मार्की जस्तो महत्वपूर्ण भूमिकामा अनुबन्ध हुने अवसर पाएका छन् ।

पोखराको मार्की प्लेअर बन्दा समिर निकै खुशी छन् र त्यसमा आफूले पाएको अवसरलाई सदुपयोग गर्ने उनको लक्ष्य छ ।

सुरुवाती करियर : किपरबाट फरवार्ड

बारा निजगढका २० वर्षीय समिर सुरुमा क्रिकेट खेल्थे । स्कुलमा पढ्दा खेलकुदको माहोल हुन्थ्यो । त्यसलै उनले सुरुमा क्रिकेट खेल्न थाले । त्यसमा उनी विकेटकिपिङ गर्थे ।

स्कुलमा हुँदा उनी अवसर पाएसम्म क्रिकेट र फुटबल खेल्थे । उनले सुरुमा फुटबलमा पनि गोलकिपरको भूमिकामा खेले । साथीहरुको लहैलहैमा लागेर स्कुलमा क्रिकेट फुटबल खेल्थे उनी ।

एकदिन दाईहरुले उनलाई फुटबलमा गोलकिपरको भूमिका दिए । एक दिन गोलकिपर नआएपनि समिरले उक्त अवसर पाएका थिए । इँटाको पोष्ट बनाएर खिन्थ्यो । त्यसमा तर बिना ग्लोभ्स खेल्दा उनको औँलामा चोट लाग्यो ।

गोलकिपिङ गर्दा हातमा चोट लागेपछि उनले उनले फुटबलमा फरवार्डमा खेल्न थाले । उनी जसरी पनि फुटबल खेल्ने लक्ष्यमा थिए । त्यसका लागि उनी जे गर्न पनि तयार हुन्थे । बरु पढाई छाड्थे तर उनी फुटबल भने खेल्थे ।

जुत्ता हुन्थेन । खाली खुट्टै खेल्थे । उनी पढ्न भन्दा पनि फुटबल खेल्नमै केन्द्रित थिए । ‘जसरी हुन्छ मलाई फुटबल खेल्नु थियो’ सानै देखि समिरमा यही जोश थियो ।

फुटबल खेल्न थालेपछि उनले पढाई पनि छाडे । सुरुमा स्कुल र परिवारले पढ्नुपर्छ भनेपनि उनको ध्यान फुटबलमै थियो । त्यसपछि परिवारले पनि उनलाई फुटबल नै खेल्न छुट दियो र सपोर्ट पनि पाए । स्थानिय स्तरमा विभिन्न प्रतियोगिताहरु खेल्न थाले ।

तर खेल्दै जाँदा उनलाई खै के भयो उनले फुटबल खेल्न पनि छाडे । उनले भने जस्तो अवसर पाएनन् । तर समिरले फुटबल छाडेपनि उनलाई भने फुटबले पछ्याइरह्यो । एक दिन उनले साफ यू-२० का लागि खेलाडी छनोट हुँदैछ भन्ने थाहा पाएपछि फेरि फुटबल खेल्नुपर्छ भन्ने लाग्यो ।

पढाई नै छाडेर फुटबल नै खेल्छु भनेर लागेका समिरले त्यो संकल्प सम्झिए अनि छनोट कार्यक्रममा गए । जितपुर सिमरामा भएको जिल्ला छनोट पार गरेर उनी प्रदेश स्तरिय छनोटका लागि लालबन्दी पुगे ।

त्यहाँ पनि छनोट भएर उनी केन्द्रीय स्तरका छनोटका लागि काठमाडौं पुगे । त्यहाँ प्रशिक्षणपछि उनी सन् २०२३ मा काठमाडौंमै भएको साफ यू१९ लागि अन्तिम टोलीमा छनोट भए । त्यहाँ उनले आफ् प्रतिभालाई अझ निखार्ने अवसर पाए । सुरुमा उनको गति राम्रो भएपनि फिनसिङमा केही कमजोरी थियो । त्यसलाई उनले मिहिनेत गर्दै सुधार गरे ।

समिर सुरुमा क्रिकेट खेल्थे । स्कुलमा पढ्दा खेलकुदको माहोल हुन्थ्यो । त्यसलै उनले सुरुमा क्रिकेट खेल्न थाले । त्यसमा उनी विकेटकिपिङ गर्थे ।

त्यसैको नतिजा उनले साफ यू१९ च्याम्पियनसिपमा ३ गोल गरे । त्यसपछि उनले गत वर्ष पोखरामा भएको २३औं आहारारा पोखरा गोल्डकप खेल्ने अवसर पाए । त्यो पनि ए डिभिजन लिगको च्याम्पियन टिम चर्च ब्वाइज युनाइटेडबाट खेल्न पाए ।

त्यसमा उनले विभागीय टोली पुलिस र आर्मी क्लब विरुद्ध उत्कृष्ट प्रदर्शन गर्दै गोल पनि गरे ।

मलेसियाविरुद्ध गोल र राष्ट्रिय टिममा डेब्यु

समिरले नेपालको उमेर समूहबाट खेलेपनि डिभिजन लिग नै नखेली राष्ट्रिय टिमबाट डेब्यु गर्ने अवसर पाए । उमेर समूह र क्लब स्तरमा राम्रो खेलेपनि उनी गत वर्ष राष्ट्रिय टिममा परेका थिए ।

लिगलाई राष्ट्रिय टिमको खेलाडी तयार पार्ने थलोको रुपमा लिइन्छ । तर समिर भने अपवादमध्ये बने । नेपालमा नियमित लिग नहुँदा पनि समिरले लिगको अनुभव लिन पाएनन् ।

समिरले पनि लिगबाटै राष्ट्रिय टिममा खेलाडी छानिने प्रावधान भएपनि आफ्नो हकमा अनौठो भएको बताएका थिए । उमेर समूहबाट खेलेपछि उनलाई राष्ट्रिय टिमको क्याम्पमा बोलाइएको थियो । चोटका कारण त्यसबेला उनी क्याम्पमा जान सकेनन् । क्लबहरुले पनि उनलाई अनुबन्ध गर्न खोजेको थियो ।

पछि उनले गत वर्ष माघमा पोखरामा भएको आहारारा पोखरा गोल्डकप खेल्दै क्लब फुटबलमा डेब्यु गरे । ए डिभजन लिगको च्याम्पियन चर्च ब्वाइजबाट खेल्दै उनले डेब्यु गरेका थिए ।

त्यसपछि उनको करियरले गति लियो । गत वर्ष चिनियाँ नयाँ वर्षको अवसरमा काठमाडौंमा भएको चिनिया प्रान्तिय टिम विरुद्ध नेपाल यू२३ टिमबाट समिरले खेलेका थिए । पहिलो रोजाईमा खेलेका उनले नेपालका लागि २ गोल गरे ।

साफ यू२० च्याम्पियनसिपमा गरेको प्रदर्शनले तात्कालिन राष्ट्रिय टिमका प्रशिक्षक भिनसेन्चो अल्बर्टो एनेसको नजरमा उनी परेका थिए । चिनिया प्रान्तिय टिमविरुद्ध पनि प्रभाव देखाएपछि उनी फिफा विश्वकप छनोट अन्तर्गत बहराइन विरुद्ध हुने दुई खेलका लागि सिनियर टिम समावेश भए ।

बहराइन विरुद्धको खेलअघि नेपाली टोली तयारीका लागि मलेसियासँग उसैको मैदानमा अभ्यास खेल खेलेको थियो । अनफिसियल म्याच भएपनि उक्त खेलमा वैकल्पिक खेलाडीको रुपमा खेलेका समिरले नेपाल ४-१ ले पराजित हुँदा एक गोल गरेका थिए ।

छोटो समयमै समिरको करियरले भने फड्को मार्दै थियो । त्यसपछि नेपाली टोली बहराइन पुग्यो । त्यहाँ उनले बहराइन जस्तो बलियो टोली विरुद्ध डेब्यु गर्ने अवसर पाए ।

रिफास्थित नेसनल स्टेडियममा भएको खेलमा ७९औं मिनेटमा हिसुव थपलियाको स्थानमा मैदान प्रवेश गर्दै समिरले नेपालको सिनियर टिमबाट डेब्यु गरे । राष्ट्रिय टिमबाट डेब्युमा छोटो समय मैदानमा बिताएनपि आफ्नो सानै देखिको सपना पूरा हुँदा समिर निकै खुशी थिए ।

‘पहिले देखिको सपना थियो राष्ट्रिय टिमबाट खेल्ने । त्यसैले डेब्यु क्षण मेरो लागि विशेष थियो । त्यो क्षणमा मलाई घरको धेरै सम्झना आयो । मैले मेरो ममीलाई विशेष रुपमा सम्झिएँ’ समिरले डेब्युपछि अनलाइनखबरसँग कुराकानीमा भनेका थिए ।

उनले यति चाँडै राष्ट्रिय टिममा डेब्यु होला भनेर सोतेका थिएनन् । तर आफ्नो कडा मिहिनेत र परिश्रमको कारण त्यो सम्भव भएको समितरले बताएका थिए ।

राष्ट्रिय टिमबाट डेब्यु गरेपछि समिरले अझै धेरै सपनाहरु बाँकी रहेको बताएका थिए । अझै मिहिनेत गरेर नेपालका लागि लगातार खेल्ने र उपाधि जित्ने उनको लक्ष्य छ ।
पोर्चुगलका क्रिस्टियानो रोनाल्डो र नेपालका अन्जन विष्टको खेल मन पराउने समिर पनि त्यस्तै गोल गर्न चाहन्छन् ।

अहिले समिर चर्च ब्वाइज युनाइटेडबाटै लगातार नकआउट फुटबल प्रतियोगिताहरु खेलिरहेका छन् । उनले गत अगष्टमा घरेलु मैदानमै भएको साफ यू१९ च्याम्पियनसिप पनि २ गोल गरेका थिए ।

यस्तै गत अक्टोबरमा भएको एएफसी यू-२० एसियन कप छनोटमा पनि उत्कृष्ट प्रदर्शन गरे । उनले चाइनिज ताइपेई यू-२० टिम विरुद्ध ह्याट्रिकसहित कूल ४ गोल गरेका थिए ।

उमेर समूहको राष्ट्रिय टिमबाट ९ गोल गरिसकेका समिरले नेपालको सिनियर टिमबाट भने गोल गर्न बाँकी छ ।

 

प्रस्तुती : गोविन्दराज नेपाल

Read Full