शेयर बजार र कर

शेयर बजारमा प्राप्त हुने नाफामा कर अनिवार्य गरिएको हुन्छ । व्यक्ति तथा कम्पनीले शेयर कारोबारबाट हुने नाफामा फरक–फरक दरमा कर तिर्छन् । तपाईंले शेयरमा लगानी गर्नुभएको छ र किनेको भन्दा बढी मूल्यमा बेच्नुभयो भने प्राप्त गरेको लाभमा कर तिर्नुपर्छ ।

तपाईं व्यक्तिगत लगानीकर्ता हुनुहुन्छ भने करको दर तपाईंको डिम्याट खातामा होल्डिङ भएको अवधिमा निर्भर हुन्छ । शेयरको बिक्रीबाट प्राप्त हुने पूँजीगत लाभमा व्यक्तिलाई दीर्घकालीन र अल्पकालीन गरी दुई भिन्न दरमा कर लगाइन्छ । दीर्घकालीन पूँजीगत लाभमा ५% कर लाग्छ ।

दीर्घकालीन भन्नाले लगानीकर्ताले ३६५ दिनभन्दा बढी शेयर होल्ड गरी राखेको हुनुपर्छ । त्यसैगरी छोटो अवधिको पूँजीगत लाभमा ७.५% कर तिर्नुपर्छ । छोटो अवधि वा अल्पकालीन भन्नाले लगानीकर्ताले ३६५ दिनभित्र आफ्नो स्टकहरू बिक्री गर्ने लगानी भन्ने बुझिन्छ ।

शेयरको बिक्रीबाट हुने पूँजीगत लाभमा लाग्ने करको दर संस्थागत लगानीकर्ताको हकमा १०% रहेको छ । संस्थागत लगानीकर्ताले यसरी भुक्तान गरेको पूँजीगत लाभकरलाई एड्भान्स करको रूपमा लिई वर्षको अन्तिममा समायोजन गर्न पाउँछन् ।