शेयर बजार

भ्यालु इन्भेस्टिङ
भ्यालु इन्भेस्टिङ (मूल्यमा आधारित लगानी) धेरैले प्रयोग गर्न खोज्ने एउटा लगानी रणनीति हो । लगानीको यो शैलीमा बजारले कम मूल्यांकन गरेको शेयर वा अरू धितोपत्रहरूको खोज गरिन्छ र त्यसमा लगानी गरिन्छ । यस किसिमको अभ्यास गर्ने लगानीकर्ताहरूले कम्पनीको आधारभूत पक्षको विश्लेषण गर्छन् । कम्पनीको आम्दानी, सम्पत्ति र दायित्व केलाउँछन् ।

कम्पनीको शेयरको बजार मूल्य र वास्तविक (आन्तरिक) मूल्यलाई दाँजेर हेर्छन् । वास्तविक मूल्यभन्दा बजार मूल्य कम छ भने शेयर खरिद गर्छन्, नत्र गर्दैनन् । यो शैलीमा कम्पनीको वास्तविक मूल्य पहिचान गरी सम्भावित नाफा प्राप्त गर्ने निरन्तर प्रयास लगानीकर्ताको हुन्छ । भ्यालु इन्भेस्टरले प्रायः दीर्घकालीन लगानी र जोखिम व्यवस्थापनमा जोड दिन्छन् ।

भ्यालु इन्भेस्टिङका आधारभूत सिद्धान्त

• आन्तरिक मूल्य
•  सुरक्षा मार्जिन
•  दीर्घकालीन दृष्टि
•  मौलिक विश्लेषण
•  विपरीत दृष्टिकोण
•  विविधीकरण

बेन्जामिन ग्राहम, वारेन बफेट र सेठ क्लारम्यान जस्ता प्रख्यात लगानीकर्ताले यी सिद्धान्तलाई पछ्याएर महत्वपूर्ण सफलता हासिल गरेका छन् ।
भ्यालु इन्भेस्टिङ पनि जोखिममुक्त भने हुँदैन किनकि बजार अवस्था परिवर्तन हुँदा कम मूल्यवान् सम्पत्तिहरू दीर्घकालमा घट्न सक्छ । कुनै पनि लगानी रणनीतिमा सफलताको लागि पूर्ण अनुसन्धान, उचित लगनशीलता र अनुशासन आवश्यक छ ।

ग्रोथ इन्भेस्टिङ
ग्रोथ इन्भेस्टिङ (वृद्धिउन्मुख लगानी) भनेको भविष्यमा सम्पत्तिहरूको बजार मूल्य बढ्छ भन्ने मान्यतामा लगानी गर्ने शैली हो । यो लगानी शैलीमा बजार मूल्य वृद्धिको बलियो सम्भावना भएका कम्पनीको खोजी गरिन्छ ।

यो दृष्टिकोण पछ्याउने लगानीकर्ताहरूले सामान्यतया उदीयमान, नवीन उत्पादन वा सेवाहरू प्रदान गर्ने कम्पनीलाई लक्ष्य गर्छन् । तिनीहरू यी कम्पनीको शेयरको लागि बढी मूल्य तिर्न तयार हुन्छन् । लगानीकर्तालाई समयसँगै उक्त कम्पनीको पनि आर्थिक वृद्धि हुन्छ भन्ने विश्वास हुन्छ । ग्रोथ इन्भेस्टरले प्रायः लाभांश आम्दानीभन्दा पूँजी र मूल्यवृद्धिलाई प्राथमिकता दिन्छन् । यस्ता लगानीकर्तामा सामान्यतया उच्च जोखिम वहन क्षमता हुन्छ । यो रणनीति सम्भावित उच्च प्रतिफल खोज्नेहरूका लागि उपयुक्त हुन्छ । उनीहरूले अधिक अस्थिरतालाई स्वीकार गरेका हुन्छन् ।

भ्यालु इन्भेस्टिङ र ग्रोथ इन्भेस्टिङ मध्ये के रोज्ने ?
भ्यालु इन्भेस्टिङको सबल पक्षःभ्यालु इन्भेस्टरले बजारमा कम मूल्यांकन भएका सम्पत्तिहरू खोज्छ, सुरक्षाको मार्जिन र सम्भावित जोखिमको विचार गर्छ । यो रुढिवादी र पुरानो लगानी दृष्टिकोण हो । लगानीकर्ताहरू स्थिर आयप्राप्त हुने सम्पत्ति खोज्छन् र आधारभूत विश्लेषणमा जोड दिन्छन् ।

भ्यालु इन्भेस्टिङका कमजोर पक्षः बजार तेजीको समय (बुलिस मार्केट) मा सस्तो शेयरहरूको मूल्य बढ्ने सम्भावना कम हुन्छ । पूँजीगत लाभ प्राप्त गर्न धेरै समय लाग्न सक्छ।

ग्रोथ इन्भेस्टिङको सबल पक्षः यसले भविष्यमा विस्तारको लागि उच्च क्षमता भएका कम्पनीहरूलाई लक्ष्य गर्छ । यसमा पूँजी र मूल्य वृद्धिको सम्भावना उच्च हुन्छ ।

दीर्घकालीन सोच भएका जोखिम–सहन सक्ने लगानीकर्ताहरू जो उच्च प्रतिफलको अपेक्षा गर्छन् र अस्थिरतालाई स्वीकार गर्छन् उनीहरूका लागि यो उपयुक्त शैली हो ।
ग्रोथ इन्भेस्टिङको कमजोर पक्षः छिटोछिटो मूल्य बढ्ने शेयर अधिक अस्थिर हुन्छन् र उच्च जोखिम निम्त्याउन सक्छन् ।

समग्रमा दुवै खाले लगानी रणनीतिका आ–आफ्नै सबल र दुर्बल पक्ष छन् । सफल लगानीको लागि एक सन्तुलित पोर्टफोलियो, लगानी लक्ष्यको विविधीकरण र आवधिक समीक्षा महत्वपूर्ण हुन्छ ।