शेयर बजार

वारेन बफेट विश्वभरका सफल लगानीकर्ताहरूमध्ये एक हुन् । उनको लगानी सूत्रलाई धेरैले सिको गर्न खोज्छन् । उनको मुख्य लगानी सूत्र यस प्रकार छन्ः

भ्यालु इन्भेस्टिङः बफेट एक भ्यालु इन्भेस्टर हुन् । यसको मतलब उनले आन्तरिक मूल्यभन्दा कम मूल्यमा बजारमा कारोबार भइरहेका शेयर खरिद गर्नुपर्छ भन्छन् ।

दीर्घकालीन दृष्टिकोणः बजारमा समय महत्वपूर्ण हुन्छ भन्दै उनले खरिद गरिएका शेयर लामो समय होल्ड गर्ने गरेका छन् ।

सुरक्षाको मार्जिनः बफेटले लगानी गर्दा सुरक्षाको मार्जिनलाई जोड दिन्छन् । यसको मतलब सम्भावित नोक्सानीलाई सकेसम्म कम गर्ने हो । उनका अनुसार शेयरको आन्तरिक मूल्यभन्दा कममा खरिद गर्ने प्रयास निरन्तर जारी राख्नुपर्छ ।

परिमाणभन्दा गुणस्तरमा जोडः बफेट आफ्नो लगानीलाई व्यापक रूपमा विविधीकरण गर्नुको सट्टा राम्रो गुणस्तरका कम्पनीहरूमा केन्द्रित गर्न रुचाउँछन् । उनले भनेका छन्, ‘विविधता अज्ञानता विरुद्ध कवच हो ।’

बुझेको क्षेत्रमा मात्र लगानीः बफेटले लगानीकर्ताहरूलाई उनीहरूले बुझेको व्यवसायमा मात्र लगानी गर्न सल्लाह दिन्छन् । जुन वित्तीय उपकरणहरू र उद्योगहरूलाई बुझ्नुहुन्न त्यस्तो उपकरण र उद्योगमा लगानी नगर्नुहोस् ।

व्यवस्थापनका कुरा : बफेट कम्पनीको व्यवस्थापन टोलीको सक्षमता र अविच्छिन्नतामा जोड दिन्छन् । सफलताको ट्र्याक रेकर्ड बनाएको र शेयर होल्डरको चासोलाई प्राथमिकता दिने प्रबन्धक भएका कम्पनीको शेयर उनले खोज्ने गरेका छन् ।

आर्थिक गढ निर्माणः आर्थिक गढ निर्माण (इकोनोमिक मोट्स) बफेटको अर्को लोकप्रिय अवधारणा हो । यस अवधारणा अनुसार केही कम्पनीको प्रतिस्पर्धात्मक लाभ तथा लामो समयसम्म टिकिरहने क्षमता अरू कम्पनीको भन्दा बलियो हुन्छ । गहिरो, फराकिलो खाडलले घेरेको खण्डमा आक्रमणकारीबाट महल सुरक्षित हुन्छ भन्ने विम्बको प्रयोग यहाँ गरिएको हो ।

दीर्घकालीन लगानी गर्ने सोच भएका व्यक्ति जो पर्याप्त गृहकार्य गर्न र शेयरहरू सावधानीपूर्वक चयन गर्न चाहन्छन् तिनीहरूका लागि बफेटका सूत्रहरू उपयोगी छन् । सबैले बफेटको सफलताको नक्कल गर्न सक्दैनन् किनकि उनीसँग अनुभव, स्रोत र सूचनामा पहुँचको अद्वितीय संयोजन छ । यसबाहेक जोखिम सहनशीलता नभएका वा लगानीको स्पष्ट लक्ष्य नभएका लगानीकर्ताको लागि उनको रणनीति उपयुक्त नहुन सक्छ ।