आईपीओ

बिक्री प्रबन्धक (इस्युम्यानेजर) को विशिष्ट भूमिका उद्योग र संगठनको आधारमा भिन्न हुनसक्छ । यहाँ बिक्री प्रबन्धकका केही सामान्य कामहरूको चर्चा गरिएको छ ।

धितोपत्र व्यवसायी (मर्चेन्ट बैंकर) नियमावली अनुसार बिक्री प्रबन्धकले निम्नानुसारका काम गर्न सक्छन् :

क) धितोपत्र निष्काशनका लागि विवरणपत्र, बिक्री सम्बन्धी प्रस्ताव तथा अन्य विवरण तयार गर्ने ।

ख) कम्पनीले निष्काशन गरेको धितोपत्रहरू बिक्री नभएको अवस्थामा आफूले खरिद गर्न प्रत्याभूति (अन्डरराइटिङ) गर्ने ।

ग) कम्पनीको तर्फबाट धितोपत्रधनीहरूको अभिलेख राख्ने तथा धितोपत्रहरूको नामसारी गर्ने, शेयर रजिस्ट्रेसन सम्बन्धी सेवा दिने ।

घ) ग्राहकसँग सम्झौता गरी लगानी व्यवस्थापन सम्बन्धी सेवा दिने ।

ङ) संस्थागत परामर्श सेवा प्रदान गर्ने ।

मर्चेन्ट बैंकरले मर्चेन्ट बैंकिङ बाहेक अन्य व्यवसाय गर्न सक्दैन । बैंक तथा वित्तीय संस्थालाई भने यो नियम लाग्दैन ।

मर्चेन्ट बैंकरले लिने शुल्क

१. निष्काशन गरिने धितोपत्रका लागि बिक्री प्रबन्ध गरिएको रकमको बढीमा दुई प्रतिशतसम्म । यस्तो सेवा शुल्क एक लाख रूपैयाँ भन्दा कम भने हुँदैन ।

२. प्रत्याभूति सेवा उपलब्ध गराए बापत प्रत्याभूति गरेको रकमको बढीमा ४ प्रतिशतसम्म ।

३. धितोपत्रको नामसारी गरिदिए बापत प्रत्येक नामसारीका लागि १० रुपैयाँ ।

४. शेयर रजिष्ट्रारको कार्य गर्ने मर्चेन्ट बैंकरले सम्बन्धित संगठित संस्थाबाट प्राप्त गर्ने वार्षिक सेवा शुल्क सम्बन्धित संस्थाबीच भएको सम्झौता बमोजिम हुन्छ ।

५. लगानी व्यवस्थापन तथा संस्थागत परामर्श सेवा प्रदान गरे बापत ग्राहकबाट लिने सेवा शुल्क ग्राहकसँग भएको सम्झौता बमोजिम हुन्छ ।