आईपीओ

प्रारम्भिक सार्वजनिक निष्काशन (आईपीओ) मार्फत सार्वजनिक गर्नुअघि कम्पनीले धितोपत्र बोर्डमा बुझाउनुपर्ने महत्वपूर्ण दस्तावेज विवरणपत्र (prospectus) हो । यसमा कम्पनीको व्यवसाय, वित्तीय अवस्था र कम्पनीमा लगानी गर्दा हुने जोखिमहरू बारे विस्तृत जानकारी समावेश गरिएको हुन्छ । विवरणपत्र लगानीकर्तालाई लगानी गर्ने÷नगर्ने निर्णय लिनका लागि मद्दत होस् भनेर तयार पारिएको हुन्छ ।

विवरण पत्रले कम्पनीको व्यापार मोडेल, वित्तीय अवस्था, व्यवस्थापन पक्ष र जोखिमका तत्व बारे जानकारी दिने गर्छ । विवरणपत्रलाई सामान्यतया निम्न खण्डमा विभाजन गरिएको हुन्छः

कम्पनीको सामान्य परिचय : विवरणपत्रमा लगानीकर्ताहरूलाई आईपीओ मार्फत सार्वजनिक हुने कम्पनीको सामान्य परिचय दिइएको हुन्छ । जसमा कम्पनीको उद्देश्य, कम्पनीले कस्ता क्षेत्रमा लगानी गर्छ, लगानीबाट कसरी लगानीकर्ताले प्रतिफल पाउँछन् भन्ने जानकारी राखिएको हुन्छ ।

वित्तीय विवरण : यस खण्डमा कम्पनीको विगत तीन वर्षको लेखा परीक्षण गरिएको वित्तीय विवरणका साथै आगामी तीन वर्षको वित्तीय प्रक्षेपण पनि राखिएको हुन्छ ।

जोखिम कारकहरू : यस खण्डले कम्पनीमा लगानीसँग सम्बन्धित जोखिमको पहिचान र छलफल गर्छ।

क्रेडिट रेटिङ : यस खण्डले कम्पनीको क्रेडिट रेटिङ सम्बन्धी जानकारी प्रदान गर्छ ।

धितोपत्र निष्काशन तथा बिक्री प्रबन्धक : कम्पनीले बिक्री प्रबन्धकको रूपमा नियुक्त गरेको कम्पनीको जानकारी ।

निष्काशन पछिको चुक्ता पूँजी : कम्पनीले आईपीओ जारी गरेपछिको पूँजीको विवरण ।

व्यवस्थापन टोली : यस खण्डले कम्पनीको व्यवस्थापन टोलीको बारेमा जानकारी प्रदान गर्छ, उनीहरूको अनुभव र योग्यताहरू सहित ।

आयको उपयोग : यस खण्डमा कम्पनीले आईपीओबाट प्राप्त आम्दानी कसरी प्रयोग गर्ने योजना बनाएको छ भनी जानकारी दिइएको हुन्छ ।

विवरणपत्र पढ्दा कम्पनीको व्यापार मोडेल र प्रतिस्पर्धी क्षमता बुझ्नुपर्छ । कम्पनीको वित्तीय विवरण र जोखिम कारकहरू ध्यानपूर्वक समीक्षा गर्नुपर्छ । कम्पनीको व्यवस्थापन पक्ष र आईपीओबाट प्राप्त आम्दानी केमा कसरी प्रयोग गर्ने योजना छ भन्ने बुझ्नु पनि महत्वपूर्ण हुन्छ ।

आर्थिक अवस्था : आर्थिक अवस्था बुझ्नको लागि वासलात र नाफा–नोक्सान विवरण हेर्नुपर्छ ।

वृद्धि सम्भावना : के कम्पनी द्रुत गतिमा बढ्दैछ ? कम्पनीको वृद्धि बुझ्नका लागि पूँजी, नाफा, सञ्चित कोष बढेको र ऋण घटेको हुनुपर्छ ।

व्यवस्थापन पक्ष : के कम्पनीका कार्यकारीहरूसँग आवश्यक अनुभव र योग्यता छ ?

जोखिम कारक : कम्पनीमा लगानीसँग सम्बन्धित जोखिमहरू के के छन् ?

आम्दानीको उपयोग : कम्पनीले आईपीओबाट प्राप्त आम्दानी कसरी प्रयोग गर्ने योजना बनाएको छ ?

विवरणपत्रको नमूनाको लागि यो https://www.hathwaynepal.com.np/wp-content/uploads/2023/07/Prospectus_Hathway-Investment-Nepal-Ltd_for-Foreign-Employment.pdf लिङ्कमा जानुहोस् ।