आईपीओ

सबैसँग कम्पनी स्थापना गरी सञ्चालन गर्ने दक्षता, क्षमता तथा पूँजी हुन सक्दैन । एकल व्यक्तिगत लगानीमा उत्पादनमूलक, होटल, बैंक, टेलिकम, अस्पताल लगायतका ठूला कम्पनी खोलिंदैन । तर आफूसँग लगानीयोग्य रकम छ भने सञ्चालनमा आइसकेका कम्पनीमा हिस्सेदार बन्न सकिन्छ ।

बेला–बेलामा पब्लिक कम्पनीले सर्वसाधारणमा शेयर जारी गर्छन् । त्यस्तो अवसर आएको खण्डमा लगानीकर्ताले कम्पनीको शेयर खरिद गर्न सक्छन् । आईपीओमा सामान्यतया सबै सर्वसाधारणले लगानी गर्न सक्छन् । यसरी आईपीओमा लगानी गर्दा भविष्यमा उच्च प्रतिफल पाउन सकिन्छ ।

चुक्ता मूल्यमा राम्रो नाफा गर्ने कम्पनीको आईपीओमा लगानी गर्ने अवसर पाएको खण्डमा लगानीकर्ताले कम जोखिम लिई राम्रो नाफा गर्न सक्छन् । प्रिमियम तथा बुक बिल्डिङ विधिबाट निष्काशन गरिएको शेयरमा लगानी गर्दा भने जोखिम बढ्छ ।

तपाईंलाई आईपीओेमा किन लगानी गर्ने र त्यसबाट लगानीकर्ताले के कस्ता फाइदाहरू लिन सक्छन् भन्ने लाग्न सक्छ । आईपीओेमा लगानी गर्दा हुने फाइदाका बारेमा केही कुरा गरौं ।

• आईपीओेमा लगानीले सञ्चालनको प्रारम्भिक चरणमा रहेका कम्पनीको शेयरधनी बन्ने अवसर प्राप्त हुन्छ । भविष्यमा कम्पनी विकसित हुँदै जाँदा पर्याप्त लाभ प्राप्त गर्न सकिन्छ ।
• आईपीओेमा शेयर खरिद गरेर कम्पनी सफल हुँदै जाँदा दोस्रो बजारमा मूल्य बढ्न सक्छ, बढेको मूल्यमा शेयर बिक्री गरेर लाभ उठाउन सकिन्छ ।
• कम्पनी प्रति दोस्रो बजारका लगानीकर्ताहरूको विश्वास भएको खण्डमा आईपीओेमा लगानी गर्दा नाफाको सम्भावना बढी हुन्छ । लगानीकर्ताले उच्च बजार मूल्यमा उक्त कम्पनीको शेयर खरिद गर्न सक्छन् ।
• आईपीओेले कम्पनी संस्थापक, कर्मचारी र सर्वसाधारण लगानीकर्ताको लगानीलाई तरल बनाउने बाटो खुला गर्छ ।
• सामान्यतया शेयर जारी गरेका कम्पनी भविष्यमा राम्ररी स्थापित हुन्छन्, उनीहरूको वित्तीय आधार बलियो बन्दै जान्छ । सर्वसाधारण लगानीकर्तालाई कम्पनीमा पहुँच प्राप्त हुन्छ । कम्पनी स्थापनाकालमा सर्वसाधारण व्यक्तिगत लगानीकर्तालाई यस्तो अवसर उपलब्ध नहुन सक्छ ।